Русская летопись:

В лѣт̑ . ҂s҃ . х҃ . к҃а . [6621 (1113)] Бс̑ь знаменье въ слн҃ци . въ . а҃ . часъ . дн҃е . быс̑ видити . всѣмъ людемъ . ѡстасѧ слн҃ца . мало аки мс̑ца доловъ рогома . мц҃а . марта . въ . ѳ҃ı . дн҃ь . а луны . въ . ѳ҃ . к҃ . се же бывають знаменьӕ . не на добро бывають знаменьӕ въ слн҃ци и в лунѣ . или звѣздами не по всеи землѣ . но в которои любо земл̑ѣ . аще будеть знаменье . то та землѧ и видить . а ина землѧ не видить . тако се древле во дн҃и (н) а Ѡнтиѡховы . быша знаменьӕ въ Ерс̑лмѣ . ключисѧ ӕвлѧтисѧ на въздуси на конихъ . рыщуще во ѡружьи . и ѡружьемь двизанье . то се бѧше въ Иерусолимѣ токмо . а по инымъ землѧмъ не бѧше сего . ӕкожь бысть знаменье въ слн҃цѣ . проӕвлѧше Ст҃ополчю см҃рть . по семь бо приспѣ празникъ пасхы . и празьноваша . и по празницѣ разболисѧ кнѧзь . а престависѧ благовѣрныи кнѧзь Михаилъ зовемыи Ст҃ополкъ . мс̑ца априлѧ . въ . s҃ı . дн҃ь . за Вышегородомъ . и привезоша и в лодьи Киеву и спрѧтавше тѣло его . и възложиша на санѣ . и плакашесѧ по немь боӕре и дружина его всѧ . пѣвше над нимь ѡбычныӕ пѣсни . и положиша въ цр҃кви ст҃го Михаила. юже бѣ самъ создалъ