Лаврентьевская летопись:

В дн҃ь . антипаскъı . мс̑ца . априлѧ . въ . к҃д . дн҃ь . Приде Ст҃ополкъ Къıєву. [и] изидоша противу ѥму Киӕне с поклоном̑ . и приӕша и с радостью . [и] сѣде на столѣ ѡц҃а своѥго и строӕ своѥго . в се времѧ поидоша Половци на Русьскую землю . слъıшавше ӕко оумерлъ ѥсть Всеволодъ . послаша слъı къ Ст҃ополку ѡ мирѣ . Ст҃ополкъ же не здумавъ . с болшею дружиною ѡтнею . и строӕ своѥго . но свѣтъ створи с пришедшими с нимъ. [и] изъимавъ слъı всажа и в-ъıстобъку. слъıшавше же се Половци почаша воѥвати . и придоша Половци мнози . и ѡступиша Торциискъıи град̑ . Стополкъ же пусти слъı Половецьскъıѣ . хотѧ мира . и не всхотѣша Половци мира . и ступиша Половци воюючи. Ст҃ополкъ же поча сбирати воє хотѧ на не . и рѣша ѥму мужи смъıслении . не кушаисѧ противу имъ . ӕко мало имаши вои . ѡн же реч̑ имѣю ѻтрокъ своих̑ . ѱ҃ . иже могуть противу имъ стати . начаша же друзии несмъıслении гл҃ти. поиди кнѧже . смъıслении же гл҃ху . аще бъı [ихъ] пристроилъ и . и҃ . тъıсѧчь не лихо то ѥсть . наша землѧ ѡскудѣла ѥсть ѿ рати и ѿ продажь . но послисѧ к брату своѥму Володимеру . да бъı ти помоглъ . Ст҃ополкъ же послушавъ ихъ . посла к Володимеру . да бъı помоглъ ѥму . Володимеръ же собра вои свои и посла по Ростислава брата своѥго Переӕславлю. велѧ ѥму помагати Ст҃ополку .