Того же лета, по преставлении Мстислава Володимеричя, сяде в Киеве на великом княжении брат его Ярополк Володимерич Маномашь; людие бо киевьстии послаша по него. Того же лета приведе Ярополк Володимеричь Маномашь братаничя своего Всеволода Мстиславичя из Новагорода к себе в Киев, и мало дръжав его у себе, И даде ему Переаславль по крестному целованию, якоже ся бяше урядил з братом своим Мстиславом Володимеричем, по отеческому повелению, якоже им даде Переаславль с Мстиславом. Всеволод же Мстиславичь по заутрени в неделю вниде в Переаславль, и седее в нем; и того дни до обеда прииде на него другы и дядя его Юрьи съ Святополком, и согнаша его с Переаславля, и много убииства сотвориша. Иде сам Юрьи Володимеричь Манамашь в Переаславли днии осмь. И посла на него брат его Ярополк силу многу, и выведе его ис Переаславля крестнаго ради целованиа, якоже сказахом напреди. И посла в другы и другаго сына Изяслава брата своего Мстислава Володимерича в Переаславль, якоже сказахом напреди, крестнаго ради целованиа, а Всеволода Мстиславичя, братанича своего, посла в Новъгород, а брата своего Юрья Володимеричя преведе с клятвою в Полтеск. Он же оставив брата своего Святополка в Полотске, и прииде к Переаславлю на Госпожин день на Изяслава Мстиславичя. Полочяне же выгнаша брата его Святополка из Полотска, а Василка Святославичя, внука Володимера Маномаша, посадиша в Полотьске. Князь велики Киевскии Ярополк, виде неправду братьи своея, ужасеся, и даде Переаславль брату своему Вячеславу Володимеричю Манамашу, а братаничя своего Изяслава Мстиславичя выведе из Переаславля с нужею великою, и утешая его, да не скорбит ни о чем же: «Да исполню тебе, — глагола ему, — инде все». Тое же зимы Ярополк созва себе братью свою, и глаголаше им, да не обидят братаничев своих, и прослезився рече: «Братие! Суетно есть житие сие, и вся мимо идут. Где отцы наши, и деди, и прадеди; не умроша ли? Такоже и нам умрети есть, и кождо нас восприиметь по делом своим».
