Соловецкий летописец:

И в лето 7113-го збежал с Москвы чернець вор, что был диакон в Чюдове монастыре, Гришка Замятнин сын Отрепьева, и ростригся в Литве и назвался царевичем Дмитрием углецькым, которой убит по Борисову веленью, будтось убили в его место иного, а он соблюден. И собрався с литовскими людьми и з донскими казаки, пришол в Сиверские городы в Чернигов и в Путимль, и в ыные городы. И сиверские мужики и всякие люди чаяли, что он прямой царевичь Дмитрей, и учали ему городы здавати и, воевод перевязав, к нему отвозити. И учал тот Рострига жити в Путимле, и всею Сиверою учал владети и польскими городы. И того же году Бориса царя не стало. И бояря, и дворяня, и дети боярские, и гости, и торговые всякие черные люди начяявся, что он прямой царевич, Гришка Рострига, и взяли ево на Московское государьство. И Гришка с Тулы прислал бояр князя Василья Голицына да князя Василья Мосальского, да печятника своего дияка Богдана Сутупова и велел Борисову царицу Марью и сына ево царевича Феодора задавити. И они по Тришкину веленью их велели удавити. И удавя их и Бориса выняв ис церкви архагге[л]а Михаила, всех их схоронили на Стретенской улице в Вознесенском девиче монастыре просто, аки простых мирских людей. А сам Рострига, приехав к Москве, сел на Московском царстве.