Софийская летопись:

В утри же день, в неделю, рано, на память святаго Апостола Акилы, месяца иулия в 14 день, приспеша к ним ратныи полки да и все силы Новгородскыи на реку Шолону, и сташа обои вооружившееся на бой противу собе. О велико неисповедимое Божие милосердье! Недоумеет бо язык человеческый, како изрещи или написати многомилосердаго Владыки Христа свыше милостивное призрение рабом его. Якоже древле Елисею Пророку седящю близ Иердана с пятьюдесять сынов пророческых, еже слышав о нем царь Асурийскый и посла тысящю вой, повел и няти его; и узревшее воя с горы и хотяху бежати сынове пророчестии, Елисей же рече има: почто мала вой бежите, множайшии бо в нас суть? И показа им ангельских вой множество о собе, и укрепи я, и идее с ними к Асурийскым воем. Тако бо Господь свыше посла в той час своего божества невидимую силу, помагая полком великого князя, ради его великаго благочестья и веры, о ней же добре подвизашеся. Егда бо узревшее вся силы Новгородскые, скоро вметашася полки великого князя в реку противу им на конех своих, а ни единого же их конь не потчеся высоты ради брега, ниже глубиною воды потомишася, но скоро чрез реку предедше на вся силы Новгородския и ступишася вместо бьющееся. И ту сбысться реченое Пророком, глаголющим: возмятошася и всколебашася яко пьяни, Новогородци те мужие, и вся мудрость их поглощена бысть; и паке рече: вздреемашася вседше на коня своя, ты страшен еси Господи, кто противу станет ти? Тако убо Господня благодать и милость соблюдаше вся люди полков князя великого и помогаше правде его, якоже Гедеону над Мадьямы, и Авраму на царя Ходолмогора Содомьскаго; тако Бог поможе и воеводам князя великого на сия неправдивыя отступникы, на мужи Новгородстии. Егда бо сташа ополчившееся противу ратным полком великого князя Новгородци, и тако ничтоже возмогоша подъяти крепцерук своих противу им; по сами зело возмятошася от напрязанья луков стрел их и от рук оружья их, по пророческому реченью, якоже пишется: ту падоша вси творящии беззаконие, изреновени быша и не могут стати. И тако, Божьею благодатью, в час времени Новгородци обратиша лица своя назад, мечюще оружия своя на землю, и вдаша своя плеща лукаваго ополчения и побегоша вспять, отнюду же придоша; и бежаша посрамлени, мечюще с себе доспехи своя тягости ради конь своих, и ту падоша многи зело трупья их мертвы на землю.