Пискаревский летописец:

В лето 6873 преосвещенный Алексей, митрополит всеа Русии, заложи церковь каменну на Москве, бывшее чюдо в Хонех архангелом Михаилом, того же лета и кончана бысть. Того же лета июня 2 преставися князь Андрей Костянтиновичь в чернцах и в схиме, Нижнева Новаграда, тамо и положен в церкве у Спаса. И сел по нем брат его Борис Костянтиновичь. О споре Костянтиновичей. Брат же его старейший князь Дмитрей прииде к Новуграду, хотя сести на кнеженьи. Князь же Борис не съступи[ся] ему, он же иде к Москве к великому князю Дмитрею Ивановичю просити себе на него помочи. Toe же осени приде Тягай из Наручади в Резань, и взя град Переславль и пожже. Князь же Олег резанский и князь Владимер пронский собрався поидошя за ним в погоню, постигоша же его, и бысть меж ими сеча зла, и поможе бог християном, а Тяга[й] в мале утече в Наручядь.Toe же зимы приде посол из Орды от царя Баирам-Хози л) и от царицы Асан, и посадиша в Новегороде в Нижнем на кнеженье князя Бориса Костянтиновича. Князь великий Дмитрей Иванович посла в Нижней ко князю Борису игумена Сергия звать его к себе на Москву, и смирить его с братом его со князем Дмитреем. Он же не поеде. Игумен же Сергей затвори церкви в Новегороде. Князь же великий Дмитрей дасть рать свою князю Дмитрею Ко стянтиновичю, и поиде к Нижнему на брата своего с ратью. Дошедшу же ему Бережца, и тут срете его брат его князь Борис и доби ему челом. Князь же Дмитрей седе в Нижнем Новегороде, а брату своему князю Борису дасть Городец, а воя распусти. Того же лета загореся град Москва от Всех святых сверху от Чертолья, и погоре посад весь, и Кремль, и Заречье, бысть тогда засуха великая, и буря вста велия, и меташа за 10 двор головни и берна, никак нельзе было госити. И нихто не успе имения своего вынесть, все огонь поя, в 2 часа все згоре. Се же словет ве ликий пожар от Всех святых; преже бо того такова пожару не бывало. Того же лета поставлена бысть церковь камена в Торжку Преображенье. Да в Новегороде владыка Алексей постави в Онтоньеве монастыре каменную церковь на воротех, Стретенье господне. А во Пскове поставиша церковь каменную Троицу. А на Лятке м) постави Лазута каменную же церковь святаго Николы.