Литовская хроника: Густою стрелбою, штурмом нашим смЂле в день и в ночи застановляючися, другие замку запаленя преважне гасили. A до того великие дожчи нашим были на великой перешкодЂ, a потым дня 29 августа месяца слонце весело ясным променем долго пожад

Густою стрелбою, штурмом нашим смЂле в день и в ночи застановляючися, другие замку запаленя преважне гасили. A до того великие дожчи нашим были на великой перешкодЂ, a потым дня 29 августа месяца слонце весело ясным променем долго пожаданный свЂт освЂтило и того дня поляки, литва и венгры пЂшие, отважною смЂлостю з великим небезпеченства промыслом, перекопы и Полоту рЂку перебывши, под самыи стЂны замковыи огню поднесши, замок запалили, a гды огонь великую моць взял, зараз рицерство охотне, пЂшие венгерские и поляков рота канцлера коронного, также и гайдуки литовские дралися през огонь и стрелбу московскую до замку, але пред гвалтовным огнем и незгодою своею a стрелбою неприятелскою утративши 27 своих, кром ранных, назад мусЂли уступити. A назавтрее, гды огонь моц болшую взял и оборону гашеня всю отнял, поддалася москва на кролевскую ласку, гды им прирекл, если бы хотЂли якие з маетностями волно до Москвы выправитися, a которые бы хотЂли королеви служити, тым жолд жолнЂрский и плата обЂцана, що и сполнил кроль. И так Полоцко, славная столица княжат давных, з рук московских выдертая есть. Зостали были еще два замки поляком на перешкодЂ великой: Сокол над Рисою и Нисою рЂками, миль пять от Полоцка на дорозЂ Псковской ку полночи, и Туровила над Звиною миль 4 от Ули и Витебска, идучи от Полоцка.