Летопись по Воскресенскому списку:

Милосердовав же князь велики, показа к ним милость свою, и приат челобитие их, утоли гнев свой, и в тот час повел престати жечи и плентит, и плен, которой туто есть, отпустити, а которой отослан и отведен, и тех отдати. И добиша челом великому князю шестьюнадесять тысяч сребра Новгородских рублев, опроче братии великого князя, и князей прочих, и боар, и воевод и прочих всех, котории печаловалися о них. А земля их вся пленена и пожжена и до моря; не токмо бо те толко были, кои с великим князем и с братиею его, но и изо всех земель их пешею ратью ходили на них, а Пьсковскаа вся земля от себя их же воевала; не бывала на них такова война как их и земля стала.