Летопись по Типографскому списку:

В лѣто 6826 прииде посолъ на Русь лють, именемъ Кочка, и уби у Костромы 100 и 20 человѣкъ и, оттолѣ шедъ, пограби Ростовъ и церкви разграби, а люди плѣни. Тогда же и князь Юрьи поиде во Орду.
По преставлении великаго князя Андрѣа Александровича, по старѣйшеньству дошелъ бѣ степень сему князю Михаилу великаго княжениа, и поиде в Орду къ цареви, яко обычай есть взимати тамо великое княжение. Поиде же в то время во Орду и князь Юрьи Даниловичь. Бывшю же ему в Володимери, блаженный приснопамятный Максимъ митрополитъ со многою молбою браняше ему итти въ Орду, но глаголаше: "Азъ имаюся тебѣ с великою кнеинею Оксиниею, матерью княже Михайловою, чево въсхощеши изъ вочины своеа, то ти будеть невозбранно". Он же обѣщася, рекъ: "Хотя, отче, иду в Орду, но не хощу великого княжения". Бывшемъ же имъ въ Ордѣ, и дасть царь великое княжение князю Михаилу. Пришедшю же ему в Русь, и посаженъ бысть на столѣ великого княжениа въ Володимери блаженымъ митрополитомъ Максимомъ. И княжившю ему 8 лѣтъ на великомъ княжении, и сѣде въ Ордѣ инъ царь, именемъ Озбякъ, и въиде въ богомръзкую вѣру Срацинскую и оттолѣ наипаче не пощадѣти роду хрестьянскаго. А тогда нача быти вражда въ князѣхъ сихъ, аще бо и творяста миръ межь собою многажды, но врагъ нашь всепагубный диаволъ пакы рать въздвизаше. Поидоша же пакы к сему царю въ Орду оба князи великие. Бывши тамо прѣ велице межи ими, и остави царь въ Ордѣ у себѣ князя Юрья Даниловича, а князя Михаила отпусти на Русь. Минувшю же лѣту единому, и пакы безаконии Измалтяне, не сыти суща мздоимьства, егоже желаху, вземше много сребра и даша великое княжение князю Юрью Даниловичю и отпустиша с нимъ на Русь единого отъ князей своихъ, безаконьного и треклятаго, оканнаго Кавгадыа. Пришедъ же на Русь князь Юрьи, и поиде ратью къ Твери, съвокупивъ всю землю Низовскую и с кровопивцемъ Кавгадыемъ. С нимъ же 6ѣ множество Татаръ и Бесерменъ. И пришедше в землю Тверскую, много зла створиша. Бывъшемъ же имъ на Бертеневѣ, и ту срѣте ихъ князь Михаилъ Яраславичь съ своими полки. И сступившимся имъ, и бысть сѣча велика. И побѣди князь Михаилъ. И бысть избито множество ратныхъ. Великы же князь Юрьи, видѣ многы падающа вои его язвени, и отъеха в Торжекъ маломъ ратныхъ, а оттолѣ еха в Новъгородъ, а оканнаго Кавъгадыа и Тотара его не повелѣ князь Михаилъ избивати, в немже болшая послѣди бысть погибель. Сии же побѣда створися мѣсяца декебрия въ 22.