Летопись:

В лѣт̑ . ҂s҃ . х҃ . м҃г . [6643 (1135)] Геѡргии кнѧзь Володимеричь . испроси ү брата своѥго Ӕрополка Переӕславль . а Ӕрополку вда Суждаль . и Ростовъ . и прочюю волость свою но не всю . В то же лѣт̑ . ис Турова иде Изѧславъ в Мѣнескъ . ѿтолѣ же иде Новугороду к братьи. и сложишасѧ Ѡлговичи и с Дв҃довичи . и всташа вси на рать . и иде Мстиславичь Всеволодъ . и Изѧславъ на Росто|въ . и на Волзѣ воротишасѧ Новгородьци . и иде Всеволодъ ѡпѧть Новугороду. а Изѧславъ ѡста на Волоцѣ . на ту же ѡсень оувѣдавъ ѡже идеть Ӕрополкъ съ братьєю к Чернигову . и иде тамо же . В то же лѣт̑ . про то заратишасѧ Ѡлговичи . с Володимеричи . и идоша . Ӕрополкъ . Гюрги . Андрѣи . к Чернигову на Ѡлговичѣ . и сташа не дошедше города . и стоӕше нѣколико дн҃ии . и воротишасѧ ѡпѧть . мс̑цѧ . ноӕб̑ . Тоѥ же зимъı придоша Ѡлговичи с Половци . и взѧша Городокъ . и Нѣжатинъ . и село пожгоша . и Баручь пожгоша . а людьє оуидоша . и многъ полонъ взѧша. скотъı . и конѣ . Тоѥ же зимъı погремѣ . мс̑цѧ . декаб̑ . въ . ı ҃ — Тоѥ же зимъı Ӕрополкъ . согна воѣ Къıѥвьскъıӕ . а Гюрги Переӕславцѣ . и стоӕша . и҃ . дн҃ии оу Къıєва . и оумирисѧ Ӕрополкъ со Всеволодом̑ . и даша Переӕславль Андрѣєви . брату своѥму . а Володимерь Изѧславу . Мстиславичю . Тоѥ же зимъı бишасѧ Новгородци с Ростовци [на Жьдни горѣ] А. и побѣдиша Ростовци . Новгородцѣ. и побиша множ̑ство ихъ . и воротишасѧ Ростовци с побѣдою великою .