Летопись:

В лѣто 6897 Пиминъ митрополитъ поиде вътретьи къ Царюграду и тамо преставися. Тое же весны родися великому князю сынъ Костянтинъ, маиа 16. Того же мѣсяца 19 преставися велики князь Дмитрей Иванович, дръжавъ великое княжение лѣтъ 27 и 6 мѣсяць, а послѣ отца своего остался 9 лѣтъ, а женился 16 лѣтъ, а с кнеинею жилъ 24 лѣта, а всѣхъ лѣтъ жилъ отъ рожениа 40. Пръвому же сыну своему старѣйшиму Василию дасть великое княжение, второму же сыну, князю Юрью, дасть градъ Звенигородъ с всѣми пошлинами и волостми да Галичь со всѣмъ, а 3-ему сыну Андрѣю дасть градъ Можаескъ да Бѣлоозеро, 4-му сыну, князю Петру, дасть градъ Дмитровъ, а пятого сына, князя Костянтина, повелѣ поделити братии изъ своихъ удѣловъ, а княгинѣ своей дасть градъ Верию. По преставлении же его 5 сынъ его Иванъ преставися, а князь Костянтинъ четверодневенъ по отци остася, а семый сынъ его Данило преже преставися старейши. Того же лѣта, августа 15 день, седе на великомъ княжении въ Володимери князь Василей Дмитреевичь, а посаженъ царевымъ посломъ Шихаматомъ. Тое же осени преставися митрополить Пиминъ въ Царѣградѣ, септемврия 11, положенъ бысть тамо. Имѣние его разъяша ини. Мѣсяца декабря 5 преставися Андрѣева Мариа и мати княжа Володимерова, а наречена въ мнишескомъ чину Марфа, и положена у Рожества на рвѣ, юже самъ созда. Тоя же зимы бысть розмирие великому князю Василью съ княземъ Володимеромъ. И пакы смирися и дасть ему къ его отчинѣ Волокъ да Ржеву.