Летопись:

В лѣт̑ . ҂s҃ . х҃з . [6607 (1099)] Иде Ст҃ополкъ . на Дв҃да в Лѧхы . В се же лѣто быс̑ знаменье . надъ Володимеремь . мс̑ца априлѧ . два . круга . а в нею аки слн҃це . и до шестаго часа . а ночь . аки . г҃ . стѧзи свѣтлѣ Л . ѡли до зорь . Оу се же лѣто . побьени Оугре . оу Перемышлѧ . В се же И лѣто оубьенъ быс̑ Мьстиславъ сн҃ъ Ст҃ополчь . оу Володимери . мс̑ца . июнѧ . в҃ı . дн҃ь. [6608 (1100)] вниде Мьстиславъ . ѿ Давыда на море . мц҃а . июнѧ . въ . ı҃ . того же лѣта братьӕ створиша миръ межи собою . Ст҃ополкъ и Володимеръ . Дв҃дъ . и Ѡлегъ въ Оувѣтичихъ . мс̑ца августа . въ . д҃ı . дн҃ь . того же мс̑ца въ . л҃ . в томъ же мѣсти Б . брат̑ӕ всѧ снѧшас̑ . Ст҃ополкъ Володимеръ Ѡлегъ . прииде к нимъ Дв҃дъ Игоревичь . и реч̑ имъ на что мѧ есте привабили . ѡсе есмь . кому до мене ѡбида . и ѿвѣща к нему Володимеръ . ты еси прислалъ к намъ река . хощю братье приити къ вамъ . и пожаловати своее ѡбидъı . да се еси пришелъ . и сѣдиши съ своею братьею . на единомъ коврѣ . и чему не жалуеши . до кого ти ѡбида . и не ѿвѣща ему ничто же Давыдъ . и сташа оусѧ . брат̑ӕ на конихъ . и ста Ст҃ополкъ съ своею дружиною . а Дв҃дъ и Ѡлегъ съ своею дружиною . раздно кромѣ себе