Лаврентьевская летопись:

В лѣт̑ . ҂s҃ . ѱ҃ . м҃ . е҃ . [6745 (1237)] Блг҃овѣрнъıи єпс̑пъ Митрофанъ . постави кивотъ в ст҃ѣи Бц҃ѣ зборнѣи над̑ трапезою . и оукраси ѥго златомь и сребром̑ . при блг҃овѣрнѣмь кнѧзи велицѣмь Геѡргии Тогож̑ лѣт̑ . исписа притворъ ст҃оє Бц҃и Тогож̑ лѣт̑ . На зиму придоша ѿ всточьнъıѣ странъı . на Рѧзаньскую землю лѣсом̑ безбожнии Татари . и почаша воєвати Рѧзаньскую землю . и плѣноваху и до Проньска . поплѣнивше Рѧзань весь и пожгоша . и кнѧзѧ ихъ оубиша . ихже ємше ѡвъı растинахуть . другъıӕ же стрѣлами растрѣлѧху в нѧ . а ини ѡпакъı руцѣ свѧзъıвахуть . много же ст҃хъ цр҃кви ѡгневи предаша . и манастъıрѣ и села пожгоша . имѣньӕ не мало ѡбою страну взѧша . потом̑ поидоша на Коломну