Лаврентьевская летопись:

В лѣт̑ . ҂s҃ . ф . ѯ҃в . [6562 (1054)] Престависѧ великъıи кнѧзь Русьскъıи Ӕрославъ . и єще бо живущю ѥму . нарѧди сн҃ъı своӕ рекъ имъ . се азъ ѿхожю свѣта сего сн҃ве мои . имѣите в собѣ любовь . понеже въı єсте брат̑ӕ єдиного ѡц҃а и мт҃ре . да аще будете в любви межю собою . Бъ҃ будеть в васъ . и покоривыть въı противнъıӕ подъ въı. и будете мирно живуще . аще ли будете ненавидно живуще. в распрѧхъ и которающесѧ то погъıбнете самї . [и] [погубите] землю ѡц҃ь своихъ и дѣдъ своихъ иже налѣзоша трудомь своимь великъıмъ . но пребъıваите мирно послушающе брат̑ брата . се же поручаю в со|бе мѣсто столъ старѣишему сн҃у моєму и брату вашему Изѧславу Къıєвъ . сего послушаите ӕко послушасте мене . да то въı будеть в мене мѣсто . а Ст҃ославу даю Черниговъ . а Всеволоду Переӕславль . [а Игорю Володимерь] а Вѧчеславу Смолинескъ . и тако раздѣли имъ градъı . заповѣдавъ имъ не преступати предѣла братнѧ . ни сгонити рекъ Изѧславу . аще кто хощеть ѡбидѣти брата своѥго . то тъı помагаи ѥгоже обидѧть . и тако үрѧди сн҃ъı своӕ пребъıвати в любви . самому же болну сущю . и пришедшю Въıшегороду разболѣсѧ велми . Изѧславу тогда сущю. а Ст҃ославу Володимери. Все[во]лоду же тогда сущю у ѡц҃ѧ . бѣ бо любимъ ѡц҃емь паче всеє братьи . є же имѧше присно ү собе .