Лаврентьевская летопись:

Придоша Татарове к Володимерю мс̑ца феврал̑ въ г҃ на памѧт̑ стаг̑ Семеѡна во вторник преж̑ мѧс̑пус̑ за нед̑лю Д. Володимерци затворишас̑ в градѣ Всеволод̑ же и Мстиславъ бѧста а воєвода Петръ Ѡслѧдюковичь Володимерцем̑ не ѡтворѧщим̑сѧ приѣхаша Татари к Золотъıм̑ воротом̑ водѧ с собою Вододимера. Юрьєвича брата Всеволожа и Мстиславлѧ и начаша просити Татарове кнѧзѧ великого Юрьӕ єст ли в градѣ Володимерци пустиша Е по стрѣлѣ на Татаръı и Татарове такоже пустиша по стрѣлѣ на Золотаӕ ворота и посем̑ рекоша Татарове Володимерцем̑ не стрѣлѧите ѡни же үмолчаша и приѣхаша близь к воротом̑ и начаша Татарове молвити знаете ли кнѧжича вашего Володимера бѣ бо үнъıлъ лицем̑ Всеволодъ же и Мстиславъ стоӕста на Золотъıх̑ воротѣх̑ и познаста брата своѥго Володимера ѡ оумиленоє ви/л.160об./дѣньѥ и слезъ достоино Всеволодъ и Мстиславъ с дружиною своєю и вси гражане плакахусѧ зрѧще Володимера а Татарове ѿшедше ѿ Золотъıх̑ воротъ и ѡбьѣхаша весь градъ и сташа станом̑ пред̑ Золотъıми вратъı назрѣємѣ множство вои бещислено ѡколо всего града Всеволод̑ же и Мстиславъ сжалистаси брата своѥго дѣлѧ Володимера и рекоста дружинѣ своєи и Петру воєводѣ брат̑ӕ луче нъı єс̑ оумрети перед̑ Золотъıми вратъı за ст҃ую Бц҃ю и за правовѣрную вѣру хьӕньскую и не да воли ихъ бъıти Петръ Ѡслѧдюковичь и рекоста ѡба кнѧзѧ си всѧ наведе на нъı Бъ҃ грѣх̑ ради наших̑ ӕко прр҃окъ глет̑ нѣс̑ чл҃вку мдрс̑ти ни єс̑ мужства ни єс̑ думъı противу Гс̑ви ӕко Гс̑ви годѣ бъıс̑ тако и бъıс̑ буди имѧ Гс̑не блс̑но в вѣкъı створисѧ Г велико зло в Суждальскои земли ӕкоже зло не бъıло ни ѿ крщ҃ньӕ ӕкож̑ бъıс̑ нъıнѣ но то ѡставим̑ ❙ Татарове станъı своѣ оурѧдивъ оу города Володимерѧ а сами идоша | взѧша Суждаль и ст҃у Бц҃ю разграбиша и дворъ кнѧжь ѡгнемь пожгоша и манастъıрь стаг̑ Дмитриӕ пожгоша а прочии разграбиша а черньци и черници старъıӕ и попъı и слѣпъıӕ и хромъıӕ и слукъıӕ и трудоватъıӕ и люди всѣ иссѣкоша а что чернець үнъıх̑ и черпиць и поповъ и попадии и дьӕконъı и женъı ихъ и дчери и сн҃ъı ихъ то все ведоша в станъı своѣ Ж. а сами идоша к Володимерю В суб̑ту мѧс̑пус̑.ю З почаша нарѧжати лѣсъı и порокъı ставиша до вечера а на ночь ѡгородиша тъıном̑ ѡколо всего города Володимерѧ В нед̑лю мѧс̑пус̑ю по заоутрени приступиша к городу мс̑ца феврал̑ въ з҃ на памѧт̑ стаг̑ мч̑ка Феѡдора Стратилата И. и бъıс̑ плачь велик̑ в градѣ а не радос̑ грѣх̑ ради наших̑ и неправдъı за оумноженьє безаконии наших̑ попусти Бъ҃ поганъıӕ не акъı милуӕ ихъ но нас̑ кажа да бъıхом̑ встѧгнулисѧ ѿ злъıх̑ дѣлъ и сими казньми казнить нас̑ Бъ҃ нахоженьєм̑ поганъıх̑ се бо єс̑ батогъ ѥго да негли встѧгнувшесѧ І ѿ пути своѥго зла/л.161/го сего ради в праздникъı нам̑ наводить Бъ҃ сѣтованьєЦитируется по: Лаврентьевская летопись. (Полное собрание русских летописей. Том первый). Ленинград, 1926—1928.