Лаврентьевская летопись:

В лѣт̑ . ҂s҃ . ф҃ . к҃s ❙— [6526 (1018)] Приде Болеславъ съ Ст҃ополкомь на Ӕрослава с Лѧхъı . Ӕрославъ же совокупивъ Русь. и Варѧгъı . и Словѣнѣ . поиде противу Болеславу . и Стополку . [и] А приде Волъıню. и сташа ѡбаполъ рѣкъı . Буга . и бѣ оу Ӕрослава кормилець . и воєвода . именемь Будъı . нача оукарѧти Болеслава гл҃ѧ . да то ти прободемъ трѣскою черево. твоє толъстоє. бѣ бо Болеславъ великъ и тѧжекъ . ӕко и на кони не могъı сѣдѣти . но бѧше смъıслень . и реч̑ Болеславъ къ дружинѣ своєи. аще въı сего оукора не жаль . азъ єдинъ погъıну . всѣдъ на конь вбреде в рѣку и по немь вои ѥго . Ӕрослав же не оутѧгну исполчитисѧ . и побѣди Болеславъ Ӕрослава Ӕрославъ же оубѣжа съ . д҃ .ми мужи Б Новугороду. Болеславъ же вниде в Къıєвъ съ Ст҃ополкомь . и реч̑ Болеславъ разведѣте дружїну мою по городомъ на покоръмъ . и бъıс̑ тако . Ӕрославу же прїбѣгшю Новугороду и хотѧше бѣжати за море . и посадникъ Коснѧтинъ . сн҃ъ Добръıнь с Новгородьци . расѣкоша лодьѣ Ӕрославлѣ рекуще. хочемъ сѧ и єще бити съ Болеславомъ и съ Ст҃ополкомь . начаша скотъ събирати. ѿ мужа по . д҃ . кунъı . а ѿ старостъ по . ı҃ . грив̑ . а ѿ боӕръ по . иı҃ .грив̑ . и приведоша Варѧгъı . [и] В вдаша имъ скотъ . и совокупи Ӕрославъ воӕ многъı . Болеславъ же бѣ Къıєвѣ сѣдѧ . ѡканьнъıи же Ст҃ополкъ реч̑ . єлико же Лѧховъ по городу избиваите ӕ . и избиша Лѧхъı . Болеславъ же побѣже ис Къıєва . възма имѣньє . и боӕръı Ӕрославлѣ . и сестрѣ ѥго . и Настаса пристави Десѧтиньнаго ко имѣнью . бѣ бо сѧ ѥму ввѣрилъ лестью . и людии множьство веде с собою . и городъı Червеньскъıӕ заӕ собѣ. и приде в свою землю . Ст҃ополкъ же нача | кнѧжити Къıєвѣ. и поиде Ӕрославъ на Ст҃ополка . и бѣжа Ст҃ополкъ в Печенѣгъı