Лаврентьевская летопись:

В лѣт̑ ҂s҃ . х҃ . л҃г . [6633 (1125)] индикта третьӕго лѣт̑ . Престависѧ бл҃говѣрнъıи и великъıи кнѧзь Русскъıи Володимеръ. сн҃ъ Ж бл҃говѣрна ѡц҃а Всево[ло]да. оукрашенъıи добръıми нравъı . прослувъıи в побѣдах̑ . ѥго имене трепетаху всѧ странъı З. и по всѣм̑ землѧм̑ изиде слух̑ ѥго . понеже оубо ѡнъ всею | дшею възлюби Ба҃ . но и мъı мним̑сѧ Ба҃ любѧще. но аще потщим̑сѧ заповѣди ѥго схранити . тогда ӕвим̑сѧ Ба҃ любѧще . любѧи бо мѧ реч̑ заповѣди ѥго хранить . се же чюднъıи кнѧзь Володимеръ . потщасѧ Бь҃ӕ хранити заповѣди . и Бь҃и страхъ прис̑[но] имѣӕ в срд̑ци . поминаӕ слово Гс̑не . иже реч̑ ѡ семь познають въı вси члв҃ци . ӕко мои оуч҃нци єсте . аще любите другъ друга . и любите врагъı ваша . и добро творите ненавидѧщим̑ вас̑ . всѧ бо зломъıслы ѥго вда Бъ҃ подъ руцѣ ѥго . поне не взношашесѧ . ни величашесѧ . но на Ба҃ възлагаше все . и Бъ҃ покарѧше подъ нозѣ ѥго всѧ врагъı . ѡн же заповѣдь Бь҃ю хранѧ добро творѧше врагом̑ своимъ . ѿпущаше ӕ ѡдаренъı . млс̑твъ же бѧше паче мѣръı . поминаӕ слово Гс̑не гл҃щеѥ . блажени млс̑тивии ӕко ти помиловани будут̑ . и бл҃жнъ разумѣваӕи на нища и оубога . ӕко в дн҃ь лютъıи избавить и Гс̑ь . тѣмь и не щадѧше имѣньӕ своѥго . раздаваӕ требующим̑ . и цр҃кви зижа и үкрашаӕ . чтѧшеть же излиха чернечьскъıи чинъ . и поповьскъıи . подаваӕ имъ єже на потребу . и приимаӕ ѿ них̑ мл҃твъı . велику же вѣру стѧжа к Бу҃ . и сродникома своима . к ст҃ъıма мчн҃кама И. Борису и Глѣбу