Лаврентьевская летопись:

Володимеръ видѣвъ цр҃квь свершену . вшедъ в ню и помолисѧ Бу҃ гл҃ѧ . Гс̑и Бе҃ призри с н҃бсе и вижь . и посѣти винограда своѥго . и сверши ӕже насади десница твоӕ . новъıӕ люди си . имже ѡбратилъ ѥси срд̑це в разум̑ . познати тебе Ба҃ истинного . и призри на црк҃вь твою си . юже создах̑ недостоинъıи рабъ твои . въ имѧ рожьшаӕ тѧ Матере . приснод҃въıӕ Бц҃а . аже кто помолитьсѧ въ црк҃ви сеи . то оуслъıши млт҃ву ѥго . млт҃въı ради прчс̑тъıӕ Бц҃а . и помолившюсѧ єму . рекъ сице даю цр҃кви сеи ст҃ѣи Бц҃и . ѿ имѣньӕ моѥго и ѿ градъ моихъ десѧтую часть . и положи написавъ клѧтву въ цр҃кви сеи реч̑ . аще кто сего посудить да будет̑ проклѧтъ . и вдасть десѧтину Настасу Корсунѧнину . и створи праздникъ великъ въ тъ дн҃ь . болѧром̑ и старцемъ людьским̑ . и оубогим̑ раздаӕ имѣнье много .