Казанское сказание:

По отшествии же Сандамирьского, вскоре, яко трем днем минувшим, приидоша к «ему из Литвы запорожских казаков 18 и привезоша с собою 9 стенобитных. От поляков же мало отстася (Так в рукописи), токмо един полковник, а с ним 9 человек. Он же окаянный от Новагорода отъиде в Камарицкую землю и ста в Сельском городке, бе бо в той землице три городки: Сельской, Радогощь, Бросовской. И взяв с тое волости дань 120.000 и отда и своим скверным воем. Не по мнозех же днех приидоша воем руским начальники, и ста за 15 поприщ в Добруни. Тогда убо прииде с Москвы боярин князь Василей Ивановичь Шуйской, потом же и царь бысть, со образом пречистые богородицы Владимерские иконы, по благословению пресвятейшаго патриарха Иева Московского и всеа Русии, на помощь и заступление от находящих, и хотящим разорити правосиятельную християньскую веру. Господь бог вседерьжитель, всесущный творец и обладатель всея вселенныя, и заступлением пречистыя его богоматери, не до конца и не вскоре изливая на нас чашу гнева своего, но милостив человеколюбец, ожидая нашего покаяния, подавает победу на враги. И яко же снидошася на брань и устремишася, и бысть сеча велика, и погибоша внезапу вси противляющеися, не могоша бо стати противу руских полков, заступлением пречистые богородицы, они убо погибоша, яко прах пред лицем ветру.