Ипатьевская летопись:

В то же времѧ Ст҃ославичь . Игорь вноукъ Ѡлговъ . поѣха из Новагорода . мс̑ца . априлѧ . въ . к҃ . г҃ . дн҃ь во вторникъ . поимѧи со собою брата . Всеволода ис Троубечка . и Ст҃ослава Ѡлговича . сновцѧ своєго изъ Рыльска. и Володимѣра сн҃а своєго . ис Поутивлѧ . и оу Ӕрослава испроси . помочь . Ѡльстина . Ѡлексича . Прохорова вноука . с Кооуи Черниговьскими и тако идѧхоуть тихо сбираюче дроужиноу свою . бѧхоуть бо и оу нихъ кони тоучни велми . идоущимъ же имъ . к Донцю рѣкъı в годъ вечернии . Игорь жь возрѣвъ на н҃бо и видѣ слн҃це . стоӕще ӕко мс̑ць . и реч̑ боӕромъ своимъ . и дроужинѣ своєи . видите ли что єсть знамениє се Ж . ѡни же оузрѣвше и видиша вси . и поникоша главами . и рекоша моужи . кнѧже се єсть не на добро знамениє се . Игорь же реч̑ братьӕ . и дроужино . таинъı Би҃ӕ никто же не вѣсть . а знамению творѣць Бъ҃ и все моу мироу своємоу . а намъ что створить Бъ҃ . или на добро или на наше зло . а то же намъ видити и то рекъ . перебреде Донѣць З и тако приида . ко Ѡсколоу . и жда два дн҃и . брата своєго Всеволода